Swyddfa’r Comisiynydd Gwybodaeth (ICO) yw’r corff cyhoeddus annibynnol yn y DU sydd wedi’i sefydlu i hybu’r cyfle i weld gwybodaeth swyddogol ac i ddiogelu gwybodaeth bersonol. Rydym yn gorfodi’r Ddeddf Diogelu Data, y Ddeddf Rhyddid Gwybodaeth, Rheoliadau Preifatrwydd a Chyfathrebu Electronig a’r Rheoliadau Gwybodaeth Amgylcheddol.
Rydym yn darparu canllawiau ar gyfer sefydliadau ac unigolion er mwyn hybu ymwybyddiaeth o hawliau a rhwymedigaethau ym maes gwybodaeth, sicrhau y cydymffurfir â’r gyfraith a hybu arferion da. Rydym yn dyfarnu ar gŵynion cymwys ac rydym yn gallu gweithredu pan fydd y gyfraith yn cael ei thorri.
Ddeddf Diogelu Data
Mae’r Ddeddf Diogelu Data yn rhoi hawliau pwysig i bobl, gan gynnwys yr hawl i wybod pa wybodaeth amdanyn nhw sy’n cael ei chadw a’r hawl i gywiro gwybodaeth sy’n anghywir. Mae’r Ddeddf yn hybu buddiannau unigolion drwy ei gwneud yn ofynnol i sefydliadau reoli gwybodaeth bersonol mewn modd cyfrifol.
Rheoliadau Preifatrwydd a Chyfathrebu Electronig
Mae’r Rheoliadau Preifatrwydd a Chyfathrebu Electronig yn ategu’r Ddeddf Diogelu Data drwy reoleiddio sut y gall cyfathrebu electronig gael ei ddefnyddio ar gyfer marchnata i unigolion a sefydliadau pan nad ydyn nhw wedi gofyn amdano.
Ddeddf Rhyddid Gwybodaeth
Mae’r Ddeddf Rhyddid Gwybodaeth yn rhoi hawl gyffredinol i bobl weld gwybodaeth sy’n cael ei chadw gan y mwyafrif o awdurdodau cyhoeddus. Mae’r Ddeddf yn anelu at greu diwylliant agored ac atebol ar draws y sector cyhoeddus, ac mae’n caniatáu gwell dealltwriaeth o sut mae awdurdodau cyhoeddus yn cyflawni eu dyletswyddau, pam maen nhw’n cymryd y penderfyniadau y maen nhw’n eu cymryd a sut maen nhw’n gwario arian cyhoeddus.
Rheoliadau Gwybodaeth Amgylcheddol
Mae’r Rheoliadau Gwybodaeth Amgylcheddol yn gyfrwng ychwanegol i bobl sydd am weld gwybodaeth am yr amgylchedd. Mae’r Rheoliadau yn gymwys i fwy o sefydliadau na’r Ddeddf Rhyddid Gwybodaeth, gan gynnwys rhai cyrff yn y sector preifat, ac mae llai o eithriadau ynddyn nhw.
Y Weinyddiaeth Gyfiawnder yw’r adran o’r Llywodraeth sy’n ein noddi ni.
Yr wybodaeth sydd ar gael yn Gymraeg
Rhannu Gwybodaeth yn Sector Cyhoeddus Cymru: ffordd drwy’r ddrysfa? Llandrindod, 23 Ebrill 2008
Cyflwyniadau o gyfarfod llawn a sesiynau gweithdy’r gynhadledd